स्थानिक स्वराज्य संस्थांच्या निवडणुकीच्या दृष्टीने या बैठकीस विशेष महत्व!
पारनेर / भगवान गायकवाड,
पक्षीय संघटनेला बळकटी देण्याच्या दृष्टीने पारनेर तालुक्यातील राष्ट्रवादी कार्यकर्त्यांची महत्वपूर्ण बैठक रविवार दिनांक ७ सप्टेंबर २०२५ रोजी सकाळी ११:०० वा. पारनेर येथिल जिल्हा बँकेच्या सभागृहात पारनेर-नगर विधानसभा मतदारसंघाचे आमदार काशिनाथ दाते सर यांचे प्रमुख उपस्थितीत आयोजित करण्यात आली असल्याची माहिती राष्ट्रवादीचे तालुकाध्यक्ष विक्रमसिंह कळमकर यांनी दिली आहे.
दरम्यान या होणाऱ्या बैठकीच्या वृत्ताला जिल्हाध्यक्ष अशोकराव सावंत, महिला तालुकाध्यक्षा सुषमाताई रावडे, तालुका युवकाध्यक्ष भास्कर उचाळे, युवती तालुकाध्यक्षा अपर्णा खामकर यांनी दुजोरा दिला असून या बैठकीसाठी जिल्हा बँकेचे संचालक प्रशांत गायकवाड, युवा नेते विजुभाऊ औटी, महिला जिल्हा कार्याध्यक्षा सुधामती कवाद, जिल्हा उपाध्यक्ष आर एस कापसे सर, जिल्हा सरचिटणीस नितीन म्हस्के, तालुका युवक उपाध्यक्ष शिवराज कदम यांसह सर्वच मान्यवर पदाधिकारी उपस्थित राहणार असल्याचे सांगितले.
बैठकीच्या अनुषंगाने पक्षाच्या सभासद नोंदणीचा आढावा घेणे, विधानसभा निवडणुकीनंतर तालुका राष्ट्रवादीत अनेक मान्यवरांनी प्रवेश केलेला असून, पुर्वीच्याही कार्यकर्त्यांनी केलेल्या संघटनात्मक कामाची दखल घेवून संघटनेतील विविध पदांच्या माध्यमातून जबाबदाऱ्या निच्छित करण्याचा या बैठकीचा प्रमुख हेतू असल्याचे या पदाधिकाऱ्यांचे म्हणणे असून कुणावर कुठल्या पदाची जबाबदारी सोपविण्यात येणार हे पाहणे औत्सुक्याचे ठरणार आहे.
या बैठकीत संघटनेच्या मुख्य, महिला, युवक, युवती व विविध सेलच्या पदाधिकाऱ्यांच्या निवडी निच्छितकरून जाहीर करण्यात येणार असून आगामी जिल्हा परिषद व पंचायत समितीची निवडणूक लक्षात घेता ह्या होणाऱ्या निवडीतून पुढील रणनीती ठरविली जाणार असल्याचेही तालुकाध्यक्ष कळमकर यांनी यावेळी सांगितले.
राष्ट्रवादी काँग्रेस पक्षाचे कार्यकर्ते हे सातत्याने समाजाच्या, संघटनेच्या विकासात्मक वाटचालीत भागीदार राहिले असून तालुक्याच्या राजकारणाचे, संघटनेच्या बळकटीकरणाचे ध्येय लक्षात घेवून या बैठकीसाठी सर्वांनी बहुसंख्येने उपस्थित रहावे असे आवाहन तालुकाध्यक्ष विक्रमसिंह कळमकर यांनी केले आहे.
